بين الجنون والعقل شعرة

لان الجنون بينه وبين العقل شعره


ما انا الوحيد الي عشق من نظرة العين
ولا انا الوحيد الي جنونه كان نظره


أحلم على بستان من اربع فدادين
فدان عندي والثلاثه بين صدره


مغروس فيها الورد واعواد الرياحين
فيها الندى روحه وأشواقه وعطره


فيها البلابل يا عجيبي يوم يشدين
والهمس والاحساس فيها بان سره


حتى النسايم بينها لحظة يهبين
تلعب مع خد الصبا في رغم صغره


فيها الليالي بس قمره بين نجمين
فيها الجمال وحده محلل كاس خمره


كل القصايد في مفاتنها يغنين
سهرة غزل واول قصايدها بخصره


طير الأماني لو فرد فيها جناحين
يسبي عقول الناظرين بكل سحره


كثر الفراشات تزدحم ما بينها البين
وان شفت فوقك تحسب الألوان مطره


في وصفها قد حيرت ذوق السلاطين
يعجز بها ويضيق فيها وسع قصره


بستانها أخجل من الحــُــسن البساتين
وانهارها فيها غصون الورد جسره


في وسطها الكافور قاعد فوق صحنين
نافورة(ن) ينزف بها ويبيع عمره


أسوارها من فــُــل مطلي (ن) بلونين
وابوابها من نخل والأجراس تمره


بحر الأسامي قد رسى صوب اليمين
وبحر المعاني لو تبيه ناظر ليسره


ما بينهم برزخ فصل ما بين شطــين
وكل بحر(ن) له من الشطان عشره


مالي ملامه لو بقيت شيخ المجانين
دام الجنون بينه وبين العقل شعره