كيفية تنسيق الديكور

السلام عليكم ورحمة الله وبركاته..

كيف .. كيف .. كيف ..
كيف هو اصعب سؤال نواجهه اذا جينا نشتغل علي الديكور ..
سواء غرفه او ممر او صاله او مطبخ او دورة مياه ..
او حتى دولاب او كنبه او طاوله
او حتى مفرش
او حتي تلفون <<< بالنسبه لي كيف احطه يسار المزهريه احلى ولا يمينها

يعني فعلا الديكور اي حركه بسيطه في المكان تخرب المنظر العام ..
كنبه مايله .. برواز نازل تحت اوطالع فوق .. ابجوره لونها مش مناسب ..

عشان كذا حبيت اني اجمع
مجموعه تساؤلات واحطها بين ايديكم تنفعكم ان شا الله

* كيف تخلين مدخل شقتك جميل مريح ويستقبل ؟

طبعا مدخل الشقق دائما يسبب أزمات للساكنين ليش ؟
لانه صغير لانه احيانا يكون مدخل لاهل البيت وللظيوف
لانه يكون غالبه صغير ضيق ماله داعي ..
فالمقترحات هنا :

- يحتاج مدخل الشقق اضاءه علويه ( في السقف ) ومرايا كبيره ..
لان مدخل الشقق غالبا مايكون فيه شبابيك فيحتاج اضاءه ممتازه تعطي شراحه للمكان
مع وجود مرايا توزع الاضاءه وتعطي انتشار افضل للاضاءه وتعطي وسع للمساحة

- حطي لمسات حميميه تعطي دفء وجمال للمدخل ..
مثلا مزهرية ورد ، تحفة صغيره زجاجية ، اضاءه خافته ، سله لطيفه تحطين فيها اي شئ

- طاوله طويله مش عريضه او تجي كورنر تحطينها تحت المرايا تخدم المكان من حيث المنظر
ومن حيث الاستخدام ،، وجميل جدا لو يكون عندك ابجوره تحطينها علي الطاوله مع
الاشياء اللي ذكرتها قبل مع ورد او زرعه .. يعطون دفء رائع للمدخل ..

- ممكن تحطين علي الطاوله حوض سمك بدل التحف ..
حوض السمك يلفت النظر عن ضيق المكان ويعطي حيويه وروح ..
ودائما يكون سبب لابتسامة الضيف من القلب اول مايدخل

* كيف اقصر من منظر الغرف الطويله ؟

خلي الديكور كله متركز في الجدران الجانبيه العرضيه ..
مش علي الجدار في النهاية الطوليه ..
لانه اذا اضفتي لوحة او حتى شباك راح يكون التركيز عليها
وراح يبين مدى طول الغرفه ..

توزيع الاثاث هنا برضو ياثر في الشكل ..
يعني اذا خليتي الكنب مثلا في نهاية الغرفه برضو بيبين لك طولها
لكن الافضل ان تخلين الجلسه في منتصف الغرفه ..
ونهايتها الطوليه تحطين كرسي وطاوله او اي شي جانبي ..
لكن الاهم الجلسه الرئيسيه تكون في النص ..

عندك كمان قطع السجاد لها تأثير ..
يعني هنا تحتاجين قطع سجاد مفرقه تحطينها بالعرض بشكل متباعد
راح تقصر لك المسافه ..
ابتعدي علي السجاده الطوليه وخليكي علي السجاد المربع و الدائري ..

اهم شي هنا تفكرين في الممشى ..
يعني اذا عندك الصاله مثلا عباره عن ممر في البيت ..
انتبهي تخلين الجلسه في نص الممشى او تخلين التلفزيون قدام الممشى ..
يعني كل من مر قطع التلفزيون عن الجالس او يمر بين الجالسين ..
قبل ترتيب الاثاث افضل شي ترسمين احتمالات الترتيب علي ورق <<< مجربه

* كيف يكون ترتيب كنبتين في الصاله ؟

اذا الصاله فيها تلفزيون افضل شي الكنب يكون علي شكل L
اما يكون تفصل الكنب الريدي علي هذا الشكل او تحطين الكنبتين علي الشكل .
عشان يكون التركيز علي التلفزيون ..يعني يكون التركيز علي شئ ما في الصاله ..
وطاوله الكوفي تكون قدامهم

اذا كانت الصاله مجرد صاله تجمع و سواليف
فالافضل تكون الكنبتين مقابلات بعض بينهم طاوله الكوفي .

اذا كانت الصاله كبيره جدا ..
ممكن تفصلين الكنبتين وتخلين كل وحده في جهة ..
مثلا وحدة مقابله للتلفزيون والثانيه مقابله مكتبه مثلا ..
وطبعا هنا اكيد راح تحتاجين اضافه قطع اثاث ثانيه ..
هنا حلو يكون في جلسات متعدده في الصاله .

_

ايش اختار لون لصالتي ولا غرفتي ولا مجلسي ؟

هذا السؤال البطل دااااائما ..
اولا غلط انك تسالين احد ايش اضرب بويه لمكان لك انتي ..
البيت بيتك انتي اختاري شي بذوقك انتي كذا راح تقدرين تبدعين بعدين بالنسبه
للاثاث و الاكسسوارات .. غير عن اذا اخترتي لون بتاثير من صديقتك او جارتك او اختك ..
بتحتارين طووووول مشوارك الديكوري للغرفه ..

اختيار اللون راجع لك انتي لكن تناسق الالوان سوا له قانون ..
يعني اذا جيتي تختارين لون ثاني هنا لازم تمشين علي قانون حتى تنتجين منظر جميل ويبعث
السعاده للناظرين ..
هنا لازم نفهم تكنيك عجلة الالوان ..
لان كل لون ياثر عالثاني .. كل لون يظهر الثاني .. كل لون يطمس الثاني ..وهكذا ..
برضو طبعا اللون ياثر كثيييير في روح المكان عشان كذا لازم تفكرين بجدية عندك اختيارك للون ..

اولا عليك انك تحددين هل راح تخلين كل غرفه لون كل ممر لون ..
يعني كل غرفه لها ستايلها .. او
انك بتخلين ثيم واحد لكل الغرف بدرجات متقاربه و متناسقه .

ثانيا عليك انك تحديين كل غرفه ايش تبغين جوها ..
لان اللون ياثر بشكل اساسي علي الجو ..
يعني عندك الاحمر و البرتقالي الوان نشيطه في حين الاخضر و الازرق الوان خامله .

ثالثا استخدمي عجلة الالوان اذا جيتي تحددين الغرفه تبغين لها الوان متضاربه
او تبغين لها الوان مكمله لبعضها .

رابعا استخدمي التدريج اذا اردتي توسيع الغرفه بالالوان :
الوان غامقه في الارضية ، ودرجة افتح للجدران ، ودرجة افتح بكثيير للسقف
كذا تخلين النظر يحس ان المكان فسيييح لاعلى .

خامسا اختاري لون بويتك من اثاثك .. اذا انتي خلاص اشتريتي الاثاث
لا تحتارين في اللون خلاص استنبطي اللون من قطع الاثاث اللي عندك
من خداديتك مثلا كذا بتصير الغرفه متماسكه مش ضايعه من ناحية الالوان

سادسا امش ورا بعض خبراء الديكور اللي يرشحون طريقة
( تركيبة الـ 60 - 30 -10 )
اللي تقول خلي اللون الوسط في الغرفه بنسبة 60 بالميه .
خلي اللون الفاتح بنسبة 30 بالميه
وخلي اللون الغامق بنسبة 10 .
طبعا هذه الطريقه يرفضها بعض الناس اللي يحبون الغرفه تكون كلها بيضا
او كلها غامقه .. الناس اذواق .

سابعا اضاءة الغرفه تحكمك ..
اذا عندك شبابيك و اضاءة صناعيه قويه
ممكن تحطين الوان غامقه .. لكن اذا ماعندك اضاءه طبيعيه او صناعيه ..
فالافضل تكون الوانك فاتحه .

نقاط مهمه :
- ممكن اضافة اكسسوارات سودا للغرف وان كانت خاليه من اللون الاسود
لان اللون الاسود يعيطي حيويه للالوان الباقيه .
- لاتخلين الارضية افتح من الجدران كذا بيصير شكل الارض وكانها ضايعه
الارضيات الفاتحة ماتمشي الا مع جدران فاتحة ..( كلام خبراء الديكور ) .

كيف امشي علي قانون عجلة الالوان ؟

اذا جيتي تخططين لتنسيق الالوان في غرفتك ..
عندك كذا ثيم ممكن تختارينه من عجلة الالوان :

1- مجموعة المصاب بعمي الالوان ( Achromatic ) :

حتى تسوين غرفة بدون الوان عليك انك تختارين الالوان الطبيعيه وهي
ابيض ، اسود ، رمادي واحيانا البيج او البني ..
صوره لغرفة Achromatic :

2 - مجموعة احادي اللون ( Monochromatic ) :

انك تخلين الغرفه كلها من لون واحد بكن بدرجااااات مختلفه وممكن تضيفين لون طبيعي
( اسود او ابيض او رمادي او بيج او بني ) .
صوره لغرفة Monochromatic :

3- مجموعة التماثل ( Analogous ) :

انك تختارين الوان بطريقه معينه من العجله وهي :
تختارين لون رئيسي واحد ( الالوان الرئيسيه هي الاحمر و الاصفر و الازرق ) .
تتختارين لونين ثانويين ( اللون الثانوي هو الناتج من دمج اللون الرئيسي مع اللون الفرعي ) .
( اذكركم هنا بالالوان الفرعيه : هي التي تنتج من دمج لونين رئيسين وهي الاخضر والبنفسجي
والبرتقالي )
نعيد الطريقه هذه انك تختارين لون واحد رئيسي ولونين ثانويين ..
مثلا :
احمر + ( احمر + اخضر ) + ( احمر + برتقالي ) = غرفة متماثله .
( يبغالها ناس فاهمه في دمج الالوان وتعرف اللون متكون من ايش من اول ماتشوفه )

هذه صوره باختصار توضح الالوان المتماثله
( كل خط يعطيك مجموعة متماثله )

صوره لغرفه Analogous :

( فيه ناس هنا تقول طيب زي الثاني تدرجات اللون .. بس لاحظوا انه في دمج بين الاخضر
و الازرق اللي هم لونين مختلفين واحد رئيسي و واحد فرعي ) .

4 - المجموعه المكمله ( Complementary ) :

عشان تسوين غرفه الوانها مكمله لبعض عليك ان تختارين
كل لون واللي مواجه له يعني مثلا اذا طالعنا علي العجلة
بنشوف الاحمر مواجه له الاخضر و والاصفر مواجه له البنفسجي
و الازرق مواجه له الازرق .

صوره لغرفة Complementary :

5 - Split Complementary :

انك تختارين لون من العجله واللونين اللي على جنبين اللون المواجه له ..
يعني لو طالعنا على العجلة بنشوف الازرق و البرتقالي على احمر و البرتقالي على اصفر ..

صوره لغرفه Split Complementary :

6- مجموعة الثلاثية Triad :

انك تختارين 3 الوان متباعده عن بعض بنفس العدد ..
يعني بينهم 3 الوان 3 الوان 3 الوان ..
يعني مثلا الاحمر و الازرق و الاصفر في صوره العجلة ..

صوره لغرفه Triad :

( نشوف فيها الاخضر و البرتقالي و البنفسجي )

7 - المجموعه الرباعيه Tetrad :

انك تختارين اربع الوان متباعده عن بعض بنفس العدد ..
يعني مثلا في صوره العجلة بتطلع لنا احمر ، برتقالي مصفر ، بنفسجي مزرق و اخضر

صوره لغرفه Tetrad

كيف اختار الستاره المناسبه للغرفه ؟

الستاره نقدر نعتبرها تحدي في الديكور ..
فيه كم نقطه لازم تراعينها اذا جيتي تختارين ستارتك :
- حجم الستاره وشكلها يعتمد علي حجم وابعاد الغرفه و الشباك مثلا الستاير الطويله
مناسبه للشباك الطويل النحيف ، اوما مع الشباك القصير تجي نوعا ما ضايعه
ونفس الشي اذا الغرفه صغيره الستاره الكبيره المتكلفه ماتجي مناسبه .
ومثلا شباكك طويل وصغيييير استخدمي له الستاره اللي تنمسك من جهة وحده
يعطيها شكل ويغطي صغرها .

- عشان تخلين منظر الستاره اجمل علقي عصا الستاره
فوق الشباك بـ 15 الى 30 سم .

- خلي عصا الستاره دائما اعرض من الشباك
حتى تقدرين تفتحين الستاره الين 30 او 40 سم من الجنبين ..
حتى تدخل شمس اكثر ويبين الشباك اعرض .

طيب كيف تختارين لون الستاره :

- اختيار لون الستاره جدا جدا مهم .. الستاره هي الاساس تقريبا في الغرفه
زيها زي الكنبه زيها زي السرير .. البعض يهملها ويحط اي ستاره وبكذا
يكون غلط غليه كبيره ..

شيئين مهمين تحطينهم في بالك اذا جيتي تختارين اللون :
واحد : مساحة المكان ، اذا الغرفه صغيره فافضل شي هنا تكون الوان الستاره فاتحه جدا
حتى تعطي فسح للمكان لكن العكس صحيح للمكان الواسع فهنا يكون فيه تعدد في الاختيار
ممكن الغامق او الفاتح ماعنده اشكال .
اثنين : ستايل الغرفه .. لون الستاره مرتبط كثير بلون الاثاث و الاكسسوارات
ومرتبط اكثر بستايل الاثاث .. اثاثك عصري ستارتك لازم تكون عصريه ..
اثاثك كلاسيك ستارتك لازم ترتبط فيه ..
وبعد كذا فكري في جو الغرفه كيف تبغينه بعدها راح تقدرين تقررين لون الستاره ..

طيب انواع مساكات الستاير كيف تختارينها اذا فصلتي ستارتك ؟

Pencil pleat :

اللي تجي مزمومه كثييييير من فوق وخياطته مخفيه من ورا
يعني ماتشوفين دخلته علي العلاق ..
هذه مناسبه لغرف النوم وغرف الاسترخاء والغرف الفخمه الكلاسيك ..
يعني مجلسك ستايله فخم هذا النوع المناسب ..

شكلها في الغرفه :

هذا عكس الي قبل تجي باينه دخلته على العلاق ..
وتجي زماته او طياته خفيفه وبين كل وحده و وحده مسافه ..
هذا الستايل حلو للاقمشه اللي مزخرفه حتى تبان زخرفتها ..
النوع هذا مناسب للاثاث العصري

شكلها في الغرفه :

Pinch pleat

هذه ايضاً طريقه تركيبها في العلاقه تكون مخفيه ..
الخياطه فيها علي شكل مروحه تعطي طيات حلووه منفخه للستاره ..
هالنوع حلو في غرف الضيوف والمجالس الانيقه الهاديه و غرف الطعام

شكلها في الغرفه :

Tab tops

هذه بسيطه حلوه لغرف النوم الناعمه وصالات البيت .

شكلها في الغرفه ..

كيف ارتب الرفوف ؟

هذا السؤال ايضا وارد اذا عندك جدار فااضي ..
الارفف جميلة جدا وتعطي جو يوحي بالترتيب و التنظيم ..
فيه كم طريقه راح اسردها واسرد مزاياها ..

- الرفوف البيضا المعلقة بشكل متوازي ، هذه تعطي شكل اوسع للمكان ..
وتوحي لك ان الجدار كبير

- ترتيب الرفوف بلون معاكس للون الجدار وبطريقة عشوائية تعطي منظر
جميل للمكان وكان الجدار كله دولاب او لوحة

- الرفوف المتلاصقه المتوازيه تعطي مكان اكثر للتخزين ..
سواء تخزين كتب او ادوات مطبخ او اكسسوارات او اي شي ..

- رفين فوق الكنبه تعطي شكل مذهل للغرفة وتعطيك مساحة للعرض
زرع ، شموع ، تحف اي شي تحبين

- المساحة الضيقه في الجدار هي افضل مكان للرفوف ..
تنتج لك دولاب جديد ، وايضا دائما الرفوف جنب المغلسه حاجة مفيدة جدا .

- اذا عندك طاوله او دولاب صغير جيبي رفوف من نفس لونه واضيفيها فوقه
تعطي شكل جميل وجدا وماتصير الرفوف حاجه منفصله عنه .

- الرفوف السفلية اختيار رائع للحمام .. تعطي جو وكانك في منتجع ..
تحطين مناسف شموع شتلات .. منظرها جميل جدا .

- ترتيب الرفوف من فوق لتحت على طول الجدار .. كمان تعطي منظر رائع

- الرفوف بين الشبابيك لها نظرة غير ..
استغلال جميل للمكان شكل جميل ومفيد .

كل الشكر والامتنان على روعهـ بوحـكـ ..
وروعهـ مانــثرت .. وجماليهـ طرحكـ ..
دائما متميز في الانتقاء
سلمت يالغالي على روعه طرحك
نترقب المزيد من جديدك الرائع
دمت ودام لنا روعه مواضيعك

» تنسيق الحدائق
» فن تنسيق النيش
» طرق تنسيق غرفة الطعام
» برنامج تنسيق المواضيع في المنتديات
» تنسيق الزهور بطريقة جديده