فقير مال وآنسه مغروره
قصه وكلن قام فيها بدوره
أنا الفقير وهي أبوها تاجر
آية جمال وسيده مشهوره
أنا معاشي ماهو مكفيني
لكن مع الله حالتي مستوره
اسدد ديوني بدينٍ ثاني
تلعب بي الدنيا كأني كوره
آخذ معاش وأنطر اللي بعده
وأعدد أيام العمر وشهوره
وبنت الأكابر تشتري ماتبغى
ولاتفكر بالزمن ودهوره
شفت الجمال وقلت يالله سترك
هذا طبيعي أو أشوف الصوره
وقعدت أقلب نظرتي بالمنظر
سبحان ربي خالق الغندوره
وقمت أتفكر بين نفسي وبيني
البنت هذي شكلها مغروره
يمكن تطالعني وتعجب فيني
لا...لا..خيالي ماصدق منظوره
أخيرا أنتبهت وصدت يمي
وقامت تطالعني وهي مبهوره
أكيد واحد ماأشوفه خلفي
خلى عيون الزين ترقب نوره
طالعت أشوف ألي بهر هالحلوه
اللي سرق عين الهنوف حضوره
ولا لقيت إلا أنا بالموقف
سألت نفسي وش تبي الفرفوره
من قبل أجاوب جاوبتني بسمه
من توتها ألي كنه الأسطوره
وأنقلبت الآيه وصرت أتغلى
كني أنا الساحر وهي مسحوره
أمشي وتمشي جنبي تطالعني
وأنا مطنشها وهي مقهوره
قلت أستغل الفرصه المسنوحه
وأخضع المزيونه المغروره
قلت آمري أنتي بغيتي حاجه
قالت أبد أبي أسوي ثوره
وعن حب غيرك بأبتدي إضرابي
وأغرق بحبك والغلا وبحوره
ماتدري أني بداخلي من الفرحه
حتى معاليقي غدت مطيوره
تبي تطير وتطلع من ضلوعي
والقلب فرحه يرتجف في سوره
قلت:العهد قالت:وأنا أوفيته
من قبل أعرفه راضيه ومسروره
وخضّعتها وأنا ألي قلت من أول
من المستحيل أكسب هوا السنيوره
لكن نصيب ومنكتب ومقدّر
دارت دوايرها وكسبت الدوره .
موضوع: قصه وكلن قام فيها بدوره 
الخميس 24 مايو 2012, 1:37 pm
