السلام عليكم ورحمة الله ...
انا عضو جديد في المنتدى ...
عندي مشكلة ودي اعرضها على اعضاء المنتدى ، وامتنى من كل من يملك نصيحة ان يفيدني فيها من غير اي تجريحات او اساءات ،،
اقسم بالله المشكلة حقيقية وحساسة جدا بالنسبة لي .. ولا طرحتها هنا الا لأني عجزت القالها حل ،، وفي نفس الوقت صعب اتناقش فيها مع احد الزملاء او حتى الاقارب ..
ماراح اطول في المقدمة ... واليكم المشكلة ...!
انا شاب متزوج عمري الآن 28 سنة .. وعندي طفلين .. 3 سنوات والثاني 4 شهور ..
زوجتي عمرها 26 سنة . متعلمه و موظفة .
انا طبعا موظف كذلك وتعليمي جامعي . يعني انا وزوجتي ماعندنا اي مشكلة في الثقافة والوعي ..
مشكلتي ان زوجتي انسانه لامباليه الى ابعد حد . بمعنى ادق مالها اي وجود في حياتي وحياة اطفالنا بتاتا .
انا من طبعي من قبل زواجي مع امي واخواتي معتمد على نفسي في كل شي ..
اكلي وشربي وغسيل ملابسي ونظافتي كلها اسويها بنفسي . حتى امي واخواتي كانوا يقولولي ياحظ زوجتك فيك .
بعد ماتزوجت استمريت على نفس التصرفات .. كل اموري الشخصية انا اسويها بنفسي لأن هذا طبع فيني من اول وكمان تعاونا مع زوجتي .
حتى مع الشغالة اللي عندي في البيت ، والله مااخليها تسويلي اي شي لأني مااحب ،
لكن والله احس الشغاله احيانا تحس وتقوم تحضرلي سفرتي او تشيلها اذا خلصت ، واحيانا تنشر الملابس اللي اغسلها بنفسي .
المهم زوجتي ماهي مقدرة كل التعاون والراحة اللي هي فيها وتتهمني دائما اني مااهتم فيها ولا ادلعها .... وش رايكم ..، هذا وش هوه ؟؟
انا فيني مشكلة اعترف فيها .. اني مااسولف معاها كثير .. تدرون ليش ؟؟
انا طبعي هزلي احب المزح والتريقة ،، خاصة مع اخواني واهلي وزملائي ، ولما امزح معاها تزعل تقول مفروض ماتعاملني زي ما تعامل اهلك وزملائك ، تبغاني اصير قدامها بشخصية مختلفة تماما عن تصرفاتي مع اهلي واصحابي .. وانا والله مااقدر اصير بوجهين . علشان كذا احاول اتحاشى السواليف والمزح معاها علشان ماتزعل مني . وغالبا نقاشاتنا بسيطة جدا لانها ماتتقبل اسلوبي في المزح .
زوجتي كمان تقارن نفسها بزميلاتها بشكل مزعج جدا ، اي شغله تسويها اخواتها او زميلاتها لازم تسوي زيها علشان تكون زيهم ستايل ...
واي شي اطلبه منها تتكاسل الين اقوم اسويه انا بنفسي ، اقسم بالله حتى لو طلبتها كوب كويه تقعد تتمرقع الين اقوم انا ..
انا كمان طبعي مستحيلة ارفع صوتي او اصيح على اي احد حتى اخواني الصغار . مااحب الصياح ورفعة الصوت نهائيا نهائيا .. واتضايق وازعل اذا طلبت من احد شي وماسواه ،، ومستحيل اكرره عليه مره ثانيه . اسويه بنفسي و مااحب اتناقش وانا زعلان . علشان مااتندم على كلام اقوله بعدين .
نظام زوجتي اليومي تصحى 7 الصباح تلبس اسوي انا فطوري قدامها علشان تحس وتقولي انا اسويلك فطورك ولو يوم واحد مافي امل ،، اوديها الدوام ، نرجع 4 العصر ... انا انام طبعا الى المغرب وهي اما تنام او على التلفزيون او النت .
اصحى ارووح اجيب غداي احضره واتغدى واشيله بعدي وهي متكية على النت والا على التلفزيون والا بالتليفون ،
طبعا العيال اقسم بالله ماتمسكهم ولا تدري عنهم الا بالكثير علشان مااظلمها نص ساعه في اليوو كاملا تجلس مع العيال اما تأكلهم والا تغيرلهم ملابسهم ، وبعدها طوال الوقت مع الشغاله او انا اللي ماسكهم والاعبهم واهتم فيهم ، ياجماعه حتى حفايظ العيال اكرمكم الله وملابسهم قسم بالله انا اغيرها اذا نامت الشغاله وهي تتفرج ولا يهز فيها شعرة ...
واذا طلعت من البيت بالليل والله حتى ماتقول الادمي هذا تأخر، هو حي ، ميت ، جيعان ، مريض ،
ولا شي ..
تحط راسها وتنام ولا درت عني ..
طبعا الخميس والجمعة تطقها نومه الى 2 الظهر ، اصحى انا مع العيال الساعه 12 ، اغيرلهم ملابسهم وافطرهم والاخت نايمة ولا على بالها .
واذا قامت والله ماتسأل حتى يازوجي تبغى احضرلك شي معايه .
لاتفكرون ان هذا ضعف فيني ، لا ورب الكعبة ،،
انا بامكاني اتصرف اي تصرف ثاني ، بس ابغى استشارة او رأي يقولي هل انا صح والا غلطان .
انا قاعد اسوي الشغلات هذي لأن هذا طبعي من الله ، واستمتع جدا بالشغلات هذي ، وماني شايف فيها عيب ، بس اللي يزعلني اني القى وحده ماتحس ولاتقدر اللي قاعد اسويه علشانها .
وكل مشكله والثانية .. انت منت مهتم فيني وانت مطنشني وانت ماتسولف معايه ..
ياناس كيف اسولف معاها وانا اتمنى بس يوم واحد احس اني متزوج وعندي زوجه مهتمة بزوجها .
انا بصراحة ماودي اطول في شرح المشكلة وادخلكم معي في تفاصيل ، انا بس يهمني فعلا رأي من شاب او فتاة ، هل معي حق ازعل والا انا غلطان ..؟
واتمنى من كل قلبي الرد بكل جدية على موضوعي ..
اقسم بالله ماطرحت مشكلتي الا وانا محتار جدا ، ولا لقيت احد اشتكيله لا من اهلي ولا اهلها . علشان مااحب احد يتدخل في حياتي الزوجيه .
لكن هنا ماحد يعرفني ، لذلك ابغى استشارة ناس عاقلة .
اسف جدا للاطاله ...
وانتظر ردودكم عااااااااااااااجلا ..
موضوع: ممكن استشارة في مشكلة زوجية معقدة جدا ؟؟؟ 
الأربعاء 27 أبريل 2011, 11:54 am
